13. juni var stortingsrepresentant Bjørn Lødemel, ordførarkandidatar og fylkestingskandidatar frå Nordfjord samla til felles møte på Stokkenes gard på Nordfjordeid. Alle ønskjer å bidra til at Nordfjord blir farga blått, etter valet i september. Dette er viktig, for å få eit auka fokus på trygge lokalsamfunn i heile Nordfjord.
Høgre-representantane som var samla på Eid, ser at det er avgjerande å samarbeide om felles saker. Til saman representerer Nordfjord 30 000 innbyggjarar, og vi står sterkare om vi står samla. Ordførarkandidatar, fylkestingskandidatar og stortingsrepresentanten vår - er alle opptekne av at innbyggjarane skal oppleve å bu i eit trygt lokalsamfunn. Då er politidekninga i regionen, ei av dei store utfordringane. I heile Sogn og Fjordane er dekninga no 1,1 per 1000 innbyggjar. Målet er 2,0. Bjørn Lødemel har stilt spørsmål til justisminister Knut Storberget om, og kva dei raud-grøne har tenkt å gjere med dette.
Den lave politidekninga ser vi no utslaget av. På Eid har det vore fire innbrot i butikkar. Når utrykningstida kan vere opp mot 45-60 minutt, utgjer ikkje politiet ein trussel for aust-europeiske bandar, som kvar sommar tek nokre raid på i regionen. At utrykningstida er blitt vesentleg lenger, gjer også at politiet i fleire tilfelle er siste etaten som kjem fram til ulykker. Dette er etaten som skal sikre skadestad og gjere undersøkingar. Det er ikkje godt nok.
Høgre-representantane er svært uroa for dei aukande narkotika-miljøa i heile Nordfjord. Dette er eit utslag av at politiet ikkje kan jobbe med førebyggjande arbeid på lang sikt. Politiet gjer ein god jobb utifrå ressursane dei har, men dei treng å få auka midlar for å kunne prioritere førebyggjande arbeid.
Lensmanskonstoret i Selje er lagt ned. Dette gjev dårlegare dekning for den langstrakte kyst-kommunen, så lenge det ikkje blir auka opp med fleire stillingar for Vågsøy som no skal dekke Selje.
Høgre legg fram eit revidert nasjonalbudsjett i neste veke, der partiet set av 100 millionar meir i auka midlar til politiet. Dette gjer Høgre, fordi vi er opptekne av å auke politidekninga. Politimeister Johan Brekke har uttala at dersom han får 40 nye stillingar, så vil vi vere oppe i ei dekninga på 1,5 polititenestemann per 1000 innbyggjar. Dette vil vere vesentleg betre enn det vi har - men framleis eit stykke fram til målet om 2,0 - som står i strategiplanen politi 2020.
Nordfjord-representantane som var samla på Eid, er einige om at auka løyvingar til politiet er ei svært viktig sak for å få trygge lokalsamfunn for alle våre 30 000 innbyggjarar.
Bildetekst: Magny H Myklebust (ordførarkandidat Selje), Bjørn Lødemel (stortingsrepresentant), Olin Johanne Henden (2. kandidat fylkestinget), Sven Flo (ordførarkandidat Stryn), Liv Stave (7. kandidat fylkestinget), Aina Jøranli Heggen(ordførarkandidat Eid), ) Sjur Atle Austrheim (ordførarkandidat Gloppen), Toril Aalesrud Fjørtoft (nestleiar Sogn og Fjordane Høgre). Edvin Haugen (ordførar Hornindal) og Morten Hagen (ordførarkandidat Vågsøy) var forhindra frå å møte.
Ingen kommentarer:
Legg inn en kommentar