Høgre sitt Kvinneforum er ein del av suksessen til Høgre

I DN laurdag forrige laurdag, blir Heidi “Vampus” Nordby Lunde intervjua om den “ blå feminismen”. Ho uttalar at ho ikkje kan skjøne kvifor Høgre har eit eige kvinneforum. Vi burde heller hevde våre meiningar i andre fora i partiet.

Høgre sitt kvinneforum har fylkeslag i alle fylke. Vi arbeider for å rekruttere
fleire kvinner til å bli aktivt med i Høgre, og til å stemme Høgre. Det gjer vi med kurs i kommunikasjon og hersketeknikkar, og vi møtast til politiske diskusjonar om likestillings-tema. Vi lagar nettverk, slik at kvinner som har hatt posisjonar i partiet kan hjelpe kvinner utan politisk erfaring.

Grunnen til at eit eige forum for kvinner i Høgre er ønska, er blant anna fordi berre 9 av 30 stortingsrepresentantar er kvinner, 3 av 19 fylkesleiarar er kvinner, 15 av 79 ordførarar er kvinner, 90 av om lag 375 lokalforeiningsleiarar er kvinner, og vi har 45 kvinnelige gruppeleiarar. Både Nordby Lunde og eg veit at vår politikk er så god, at fleire kvinner burde ønskje å engasjere seg i den. Likevel viser representasjonen at vi treng eit kvinneforum som arbeider målretta for å auke kvinnedeltakinga.

At samfunnet treng “borgarleg feminisme” er, i følgje meiningsmålingane, tydelegvis mange kvinner i Norge einig med oss i. Borgarleg feminisme byggjer på likeverd og respekt for at folk vil leve ulike liv. Borgarleg feminisme tek utgangspunkt i at kvinner er ein ressurs. Feminismen erkjenner samtidig at det finst ei diskriminering som ikkje kan forklarast ut frå anna enn gamle kjønnsrollemønster. Høgre veit at kvinner generelt sett ikkje er ofre, tvert om. Kvinner er kraftfulle, kompetente, kreative og ressurssterke. Borgarlege feministar er opptekne av likestilling og likeverd mellom begge kjønn.

Vi har ikkje eit kvinneforum for å leike politikk eller ha det koselig. At vi har det kjekt saman, er ein bonus. Men eit kvinneforum kan løfte fram talent og politikk, som hovudorganisasjonen har glede og nytte av.

Heidi Nordby Lunde er velkomen på eit av møta våre, for å høyre kva Høgre sitt Kvinneforum anno 2011 jobbar med.

Innlegget vart sendt til DN, men fekk ikkje spalteplass i avisa.
Eg har også lagt inn eit par kommentarar på Vampus sin blogg, men siste kommentaren har ho nekta å ta inn. Kommentaren var konstruktiv og på ingen måte ufin, men meir ville altså ikkje Heidi Nordby Lunda høyre frå meg i denne saka.