Tysdag 24. mai hadde Gloppen Høgre gleda av å ønskje Arne Hjeltnes velkomen til bygda.
På programmet stod besøk i Kandalen hos Kandal Kjøt og gründer Bjørn Nygård. Her var også Fjellestad gardsmat som starta gombeproduksjon for 31 år sidan. Vi fekk sjå og høyre om personar som ønskjar å skape noko, som søkjer løysingar framfor problem og som ikkje gjev opp om der er motbakkar. Dette gjeld også for Gloppen Mat ved Bodil Fjellestad. Etter ein diskusjon i media om kor dårleg norsk mat er, så gjer alle desse lokalmatprodusentane dette til skamme. Vi treng berre fleire av desse gründerane.
På kvelden hadde Arne Hjeltnes ein framifrå presentasjon om sine tankar om verdiskaping i Norge, etter fleire år i Kina og USA. Hjeltnes er oppteken av levande bygder og dei unike verdiane vi har i Norge. Han meiner vi må vere meir opptekne av småkapitalistane, som står på og gjer sitt beste for å skape eit overskot som gjer at ein kan fortsetje eitt år til.
Det gjorde godt å høyre. Eg er så lei av Jens sine negative uttalar om oss som betalar formueskatt. Med eit lett hånleg flir meiner han at "milliardærane" har råd til å betale formueskatten. Men han veit så inderleg vel at 2/3 av dei som betalar denne skatten er eigarar av små- og mellomstore bedrifter. Det er veldig få eg kjenner som har noko meir enn ei normal lønnsinntekt på sin business. For min eigen del får eg minst løn utbetalt av alle tilsette, etter at alle skattane er betalt. Samtidig er eg den som jobbar flest timar, som har minst ferie, som jobbar når tilsette er sjuke, som er tilgjengeleg døgnet rundt for tilsette og kundar, og ikkje minst som tek risikoen ovanfor banken.
Difor er eg medlem og aktiv i Høgre. Fordi dette partiet er det einaste som ser at det er viktig at vi har småkapitalistar, og som er villige til å leggje forholda til rette for dei. Mitt eksempel er ikkje det verste. Der er andre som må ta opp lån for å betale formueskatten, og andre som betalar meir i skatt enn dei har i inntekt. Istadenfor å la pengane vere i bedrifta for vidareutvikling, må aktive eigarar difor tappe eigenkapital frå bedrifta for å kunne ha pengar til å leve for.
Neste gong eg lurer på om eg er mindre intelligent fordi eg ikkje har ein jobb i det offentlege med god løn, ordna arbeidstid og arbeidsforhold, gode pensjonar og ein sikker og trygg arbeidsplass, skal eg hugse på Hjeltnes sine positive ord om småkapitalistane. For skal AS Norge gå rundt i framtida, må vi ha fleire av dei for å kunne betale for velferden. Difor er det ikkje likegyldig om Erna blir statsminister i 2013. Det er nødvendig for den framtidige velferden vår.
