I dag har mannen bak blogg-namnet "Fjordman" stått fram. Han blir omtala som den store inspirasjonskjelda til massemordaren, så namnet har vore ofte i media.
Det har kome fleire kommentarar på Twitter i kveld om at ein ikkje lenger kan ete Fjordland, og at fjording og namn med fjord i, ikkje kan uttalast utan å kjenne gru.
Med namnet på bloggen min, så har eg sjølvsagt kjent ubehaget med å bruke fjord i namnet. Kan bloggen på nokon måte setjast i samanheng med meiningane til Fjordman? På det er vel svaret definitivt nei. Skal eg då endra namnet på bloggen for å hindre alle konnotasjonar til vedkomande?
Det er freistande, for det er det mest lettvinte. Samtidig nektar eg at ein fanatisk anti-islamist skal få ta hevd på og skitne til fjord-namnet. I reiselivssamanheng og marknadsføring, har fjord-namnet vore med på å gje positive assosiasjonar. Det gamle ordet for fjord - fird - har gjeve namn til både skular og aviser som eksisterer i Sogn og Fjordane i dag.
Eg vil ikkje la ein bloggar med slike meiningar få ha eigarskap til namnet, og då må vi fortsetje å bruke fjord i ulike samanhengar, slik at det har andre tydingar for folk flest. Eg trur ikkje "folk flest" les bloggen min, men det er eit prinsipp for meg.
Så bloggen min vil fortsatt heite; Fjordblikk.
